இந்தூர் (மத்தியபிரதேசம்): மத்தியபிரதேசம் மாநிலம் இந்தூரின் சுவர்ணா பக் காலணி குடியிருப்பில் இன்று அதிகாலை பயங்கர தீ விபத்து ஏற்பட்டது. இந்த விபத்தில் சம்பவ இடத்திலேயே 7 பேர் உடல் கருகி பரிதாபமாக உயிரிழந்தனர். இந்தூர் காவல்துறையின் முதற்கட்ட விசாரணையில் வீடுகளில் குறைந்த மின்னழுத்ததால் தீ விபத்து உண்டாகியிருக்கலாம் என தகவல் வெளியாகியுள்ளது.
இது குறித்து இந்தூர் காவல் ஆணையர் ஹரிநாரயணன் கூறுகையில், ‘ விபத்தில் 7 பேர் உடல் கருகி இறந்துள்ளனர். தகவல் கிடைத்ததும் தீயணைப்பு துறையினர் விரைந்து சென்று தீயை அணைக்கும் பணியில் ஈடுபட்டனர்.தீயை அணைக்க 3 மணி நேரம் போராட வேண்டியிருந்தது" என தெரிவித்தார்.
மத்தியபிரதேச முதலமைச்சர் சிவராஜ் சிங் சவுகான் அவரது ட்விட்டரில் இரங்கல் தெரிவித்திருந்தார். இந்த விபத்து சம்பவம் அறிந்து மிகவும் வேதனை அடைந்ததாகவும், இறந்தவர்களின் ஆத்மா சாந்தியடைய பிரார்த்தனை செய்வதாகவும் அவர் குறிப்பிட்டுள்ளார்.
இதையும் படிங்க:வங்கக் கடலில் உருவாகும் புயலால் ஒடிசாவிற்கு எச்சரிக்கை
